Malincunia sì à cresce in la mio vita
Senza pietà nisuna batti a mio campagna
Campagna di vissutu seminata à ferite
O quant'aghju suniatu 'ssi prati di cucagna
Quant'aghju suniatu 'ssi prati di cucagna
Una piaghja di pace un locu assuliatu
Ma fusti sempre tù la mio fida cumpagna
A mio seconda pella u mio sangue liatu
Provu di tantu in tantu di tuccà u splendore
Cume quella farfalla chi u lume affascina
È chì ghjuntu l'albore briaca si ne more
Figliola di a notte chì u ghjornu assassina
Fubbenu le mio gioie spavite è andarine
Lascendu ogni volta more si a farfalla
È di la mio muntagna sin'à le mio marine
Un sempiternu bughju s'arrizza eppò si cala
À tutte le farfalle morte à l’alburià
Vulià tende quì un palmu di dulciore
Un'eterna lumera da pude ci truvà
Tuttu ciò ch'hè mancatu dentru à u so core
4 commentaires:
Una bella puesia nant'à un tema difficiule à ammaestrà, ma da u quale vogliu cunsiderà ch'ellu hè quì più ch'e ammaestratu da a to rima. A versura hè aerea, ligera, è puru cusì pura è cusì prufonda ch'ella sembra ballà incù e parole linde chì a cumponenu.
In sta puesia cusì spuntanea, tuttu hè liberu. Hè quessu u mio parè.
PS : u solu affare chì mi dispiace in u to bloggu hè ch'ellu ci sia cusì pochi cummenti dopu à e to puesie. S'e ùn ci vedi nisun cunveniente, aghj'à richjappàmmi.
Cumpà ti ringraziu assai, metti puru un cummentu ogni tantu s'ella ti face piacè ma sè tù veni quì à rompe mi e stacche tutte e sante seconde ti torciu u collu mouhahahaaaaa!
Allora mi limiteraghju à un cummentu o dui ogni settimana per ùn fà micca troppu. (di sicuru, sta settimana, ne aghju dighjà scrittu troppu, ma diceremu... dopu à sta settimana, feraghju cusì).
Ma quantunque, mi dispiace ch'e puesie cusì belle sianu cusì pocu cunisciute.
a limita hè di un cummentu ogni mese ( e ùn deve micca francà 30 parolle... pensa à u to collu) :p
Osigno pè u restu sia puru serenu, spartu e mio puesie altrò ma ti ringraziu pè a to primura ;)Brieffu (haha!) ti salutu è ti dicu à vede ci quì u 22 d'ottobre sè Diu vole! basgi ;)
Enregistrer un commentaire