VeRsu mè

Un'altru Amore

2012-01-23T20:11:00.000+01:00

Pè s'idee senza sensu chì volt'è giranu in mè

Pè sè notte senza sonnu à pensà à più pudè

Perchè aghju 'ssa paura d' ùn vede ti mai più

Quand'u dubitu mi sfrisgia eppo l'angoscia dinù

Sò chì ti tengu caru

Pè tuttu u tempu passatu à pensà solu à tè

Pè i mo sogni svegliata duvè tù sì u mio Rè

Pè i to basgi bramati eppo pè 'ssu batticore

È 'ssa trimenda paura chè tù mi lascessi corre

Sò chì ti tengu caru

Pè a to voce d'argentu chì risona in lu mio esse

E pè a to puesia cù a meia a vulè tesse

Eppo dinù pè 'ssu male chì senza vulè mi faci

Perchè eiu senza tè ùn possu campà in pace

Sò chì ti tengu caru

Pè issa cuntradizione frà a ragiò è u core

Pè i nostri quarant'anni chì ripiglianu culore

Pè e nostre vite scorse ch'anu fattu ciò chì simu

Pè 'ssa fede ch'aghju in noi ch'ùn mi la pò caccià nimu

Sò chì ti tengu caru

Perchè sò chì una fine pò esse un'alba nuvella

E chì ci fermanu stonde à sculpisce ancu più belle

Pè l'idea chì un ghjornu pò cresce un'altru amore

Puru prontu à aspettà ch'ella venga la so ora

Sò chì ti tengu caru

Scrittu inspiratu da l'opera di C.Aznavour

J'EN DÉDUIS QUE JE T'AIME
1959

Era Scritta

2012-01-21T23:22:00.002+01:00

Aghju vistu calà si più d'un sole à meziornu

È nasce e notte pagne à l'alba di li ghjorni

Aghju vistu battelli piglià fondu è more

Nant'à i mari cheti è ricolmi d'amore

Ci sò fronde cirate in core di veranu

È l'amori i più belli à spessu si ne vanu

Un eternu vaghjime, un'eterna tristezza

Dumani assassinati da la nostra incertezza

Forse tutta a to vita tenerai 'ssa pena

D'ave sceltu sta sera di ricusà l'avvene

U passatu hè passatu ùn lu poi chjappà

À l'arrinversciu nimu ùn c'hè pussutu andà

Di fronte à 'sse stonde ùn c'iole à dubità

Ùn accadenu spessu in corsu d'un campà

Era scritta ma tù preferisci sguassà

..Vai ti lasciu parte sè voli rinuncià

Eppuru un ghjornu o l'altru duverè fà ci fronte

T'aspetta un'altra vita un'altru orizonte

Ùn ponu cresce torna l'alburi sradicati

Lascia daretu à tè i to anni strappati

L'Altra

2011-11-30T19:22:00.001+01:00

(Je est un autre - A Rimbaud)

À scrive mi

Mi palesu appena

Cercu l'Altra

A vecu quallandi

A zitella chè era

Vecu i so gesti

Sgalabati, ma i scusu
Entru

In una cuscenza svanita

Vecu ciò ch'ella vede

E so notte

Trovu è snudu un celu

Ma nisuna risposta nisuna voce

Trascorru altri territorii

Inventu u mo linguaggiu

E fughju in Puesia

Ricaduta nant'a mio terra

Murmuru

Illusione è ricordi

À scrive mi

Mi palesu appena

È ritrovu l'Altra

Libera adattazione di "l'Autre"- Andrée Chédid

Induve more ciò ch'ùn hà campatu

2011-11-26T21:36:00.001+01:00

Cosa diventa l'amore chì ùn hà campatu
Duvè si perde quandu ellu ùn hè mai statu

In chì lucacciu in chì eternu ascunditoghju
Ci sera qualchi spaziu persu à dà li alloghju

È quelli à ùn esse si amati cosa sò
Quale hè chì sà forse strangeri o forse no

Chì hè a seguita d' un destinu fiascatu

Cosa diventa l'amore chì ùn ha campatu

Cosa diventanu l'abbracci mai fatti

Induve morenu i basgi mai dati

E 'ssa prumessa chì nimu ùn s'hè fatu mai

À ribumbà indè u nulla à l'oramai

Eppo 'sse mane à ùn esse si mai strinte

Cum'è battaglie mai perse nè mai vinte

Eppo 'sse voce à ùn esse si mai chjamatu

Cosa diventa l'amore chì ùn ha campatu

Di ciò ch'ùn fu ùn c'hè nunda à ricurdà

Un fiume ch'ùn hà mai corsu ùn pò siccà

Cosa diventa l'amore chì ùn ha campatu
Duvè si perde quandu ellu ùn hè mai statu

Fà nice

2011-11-13T09:03:00.001+01:00

L’avia smenticatu u lume d un ghjornu acesu

Ma sta mane vogliu scrive, u mio core à palesu

In l alba pura nascente d’issa mane di vaghjime

À la vita chì si pesa vogliu offre le mio rime

L'acellu à la mo finestra s'hè pientatu à cantà

Cù mè hè venutu à sparte a dulcezza di campà

Generosu mi dumanda di tramandà u messaggiu

Eccu mi a piuma in manu da sparte cù tè 'ssu ragiu

Issa spera chì durmia sepellita in la mente

Oghje scalda la mio pella cum'è un sole ardente

N'avemu tantu à scopre chì ùn aviamu vistu

Chjosi chè n'eramu noi in un mondu troppu tristu

Era longu lu caminu à purtà mi versu mè

Stradoni di puesia sulcati senza vulè

Oghje fermanu stampate vistiche d'un altru tempu

Ferite è pene passate e si porta oghje lu ventu

Sè tù leghji 'ssi filari sò chì i capiscerai

Sai tù chì versu mè ùn ci ghjunghjeraghju mai

Vulia solu sapè ciò ch'ell'hè d'esse felice

Tantu peghju sè per què m'hè tuccatu à fà nice

In verità quì l'acelli ùn venenu à cantà

Sentenu u mio turmentu preferiscenu passà

È lu ghjornu chì si pesa hè spentu quant'hè a notte

Un sempiternu nuvembre accarezza la mio sorte

Fra Ombra è Lumera

2011-11-09T19:53:00.034+01:00

In tè c'hè un desertu un locu accantatu
Un rumore vistica di tutti li to mughji
Un stridu affucatu, un pesu strascinatu
Cum'elli sò 'ssi lumi annigati di bughji

In tè c'hè una storia piatta in lu prufondu
Quella chì u t' inchjostru ùn ci riesce à dì
In tè c'hè una brama, quella d'un altru mondu
Mentre chì ardifora ti tocca à campa quì

Ma in tè sò dinù millanta è più sperenze
Una trimenda fede à vince l'incertezza
Un' intima pazienza à pate isse suffrenze
Sin'à purtà le vinte versu di a chjarezza

Ma in tè sò dinù albe è ghjorni à tesse
Dumani inveraniti è tanti libri à scrive
Un fiore à sbuccia l'amore à vulè esse
È sintimi purezza chì cherenu di vive

Impastatu da l'ombra è cresciutu di lume
Eccu o caru meiu quellu chè tù si tù
Sopravive in tè cum'un eternu fume
Ancu si quellu focu ùn brusgiara mai più

Duv'elli si scontranu i chjassi appena persi
Trè passi à manu manca passatu l'addisperu
Carrughju ombralume mattunatu di versi
S'inalza u fudamentu di u to stranu imperu

Fora di tè

2011-10-16T20:29:00.016+02:00

Pella stampata
Insanguinà si
Porta serrata
Imprigiunà si

Vita sunniata
Vighjà ford'ore
Ombra spietata
A mente corre

Eppuru socu
Ci'olenu anni
Unu hè pocu
I pienti vani
Ma ogni passu
Provu à sapè
Tuttu si sguassa
Fora di tè

Tempu chì và
Viotu d'amore
Male chì stà
Alma chì more

Sorte chì và
Gira u ventu
L'assenza stà
Affundamentu

Eppuru socu
Ch'ell'hè cusì
Un'annu hè pocu
Pè guarì
Ma ogni passu
Provu à sapè
Tuttu si sguassa
Fora di tè
Grevu lu passu
Provu à sapè
Tuttu si sguassa
Fora di tè

Ùn c'hè catena
Ch'ùn pò strapà
Nè mancu pena
Ch'ùn pò pientà

Ma cumu fà
Cun chì putenza
Pè arrestà
L'indifferenza

Quant'ella pesa
'Ssa malasorte
Cum'un' offesa
Più chè a morte
À ogni passu
Provu à sapè
Tuttu si sguassa
Fora di tè
Grevu lu passu
Provu à sapè
Tuttu si sguassa
Fora di tè

Libera adattazione di "Pas Toi" JJ Goldman

Duve sò è in mè

2011-09-23T13:09:00.005+02:00

Smenticà l'ore bughje smenticà u naufragiu
Piglià solu e strade sulcate à sulana
Cavalcà ogni stonda armà si di curagiu
È avanzà dinù eppuru à malagana

Duve sò è in mè
Ci batte sempre un core
Duve sò è in mè
Ci corre sempre a fede
Ùn sò ancu à more ci vogliu torna crede

Scurdà isse parolle chì punghjenu à l'alma
Purtà solu incù sè a linda puesia
Viaghja pianu pianu vers'una sponda calma
È pruvà di risente l'ansciu di l'armunia

Strappà l'ultima funa chì stringhje u mio esse
Brusgià i vechji piani è guarisce a ferita
Accetà d'avè oghje altri liami à tesse
È accetà dinù di campà a mio vita

Duve sò è in mè
Ci batte sempre un core
Duve sò è in mè
Ci corre sempre a fede
Ùn sò ancu à more ci vogliu torna crede

Malincunia

2011-09-21T08:35:00.021+02:00

Malincunia sì à cresce in la mio vita
Senza pietà nisuna batti a mio campagna
Campagna di vissutu seminata à ferite
O quant'aghju suniatu 'ssi prati di cucagna

Quant'aghju suniatu 'ssi prati di cucagna
Una piaghja di pace un locu assuliatu
Ma fusti sempre tù la mio fida cumpagna
A mio seconda pella u mio sangue liatu

Provu di tantu in tantu di tuccà u splendore
Cume quella farfalla chi u lume affascina
È chì ghjuntu l'albore briaca si ne more
Figliola di a notte chì u ghjornu assassina

Fubbenu le mio gioie spavite è andarine
Lascendu ogni volta more si a farfalla
È di la mio muntagna sin'à le mio marine
Un sempiternu bughju s'arrizza eppò si cala

À tutte le farfalle morte à l’alburià
Vulià tende quì un palmu di dulciore
Un'eterna lumera da pude ci truvà
Tuttu ciò ch'hè mancatu dentru à u so core

Eri Tù

2011-09-08T16:01:00.017+02:00

À chì mi ghjova d'esse sè ùn mi teni più

Eri tù à mantene accesa a mio lumera

Cosa possu bramà sè ùn possu dinù

Sunià i to sogni è sperà a to spera

L'orlu di lu to sguardu era la mio cunfine

È le to mani muri à parà mi timpesta

In li to ochji chjari surghjente cristalline

Leghjia ogni stonda cum'un'eterna festa

Pò nivà di settembre e cutrà d'estatina

Si pò spenghje u ghjornu à mè chì mi pò fà

Ogni cosa mi pare diventata mischina

Ùn aghju più primure sè ùn ti possu amà

Cum'è l'ultima fronda à cumbatte vaghjime

È chì porta in ella ciò ch'ell'era veranu

Mentre l'invernu spalma u so biancu cuprime

In un ballu cutratu l'amori si ne vanu

S'hè siccatu u mo sangue svanitu u mio culore

Ciò chì mi ferma or'mai hè di pocu valè

Oghje ora sò sola è aspettu di more

Eiu aghju persu tuttu quand'aghju persu à tè

Mi Pare

2011-06-30T21:05:00.007+02:00

Mi pare certe volte di sente a to risata
Quandu u ventu leggeru face a s' impruvisata
Quand'ellu cantichjeghja fra mezzu à e fronde
Mi pare la to voce chì dolce li risponde

Mi pare certe volte di vede u to surisu
Quandu a luna chieta abbraccia u paradisu
Quandu e stelle bianche accendenu a notte
Chè tù luci frà elle mi pare certe volte

Mi pare certe volte di sente a to carezza
È tuttu in giru à me si face tenerezza
In l'aria in un soffiu in ogni chjuca cosa
Mi pare di risente a to presenza ascosa

Mi parenu cent'anni è a tempu una stonda
Di tantu chì ti portu in mè à u prufondu
Cum'è l'acqua chì corre d'issi putenti fiumi
È chì a tempu stà ballandu in li sprufumi

Certe volte aghju in mè un'aura di dulciore
E sentu u t'amore in fondu à u mio core
Mi parenu cent'anni è a tempu una stonda
Di tantu chì ti portu in mè à u prufondu

PaSsendu

2011-05-18T18:34:00.026+02:00

A mio strada fù chjara è ora s'annegrisce
In la notte turbata u dubbitu mi sfrisgia
Vittima di vesperu quand' u lume svanisce
In lu valsu sfugatu d'un'ombra cusì grisgia

Cum'è un'energia quandu ella si more
Si more ogni rimore nu u negru circondu
U pisivu silenziu d'isse tardive ore
Strangola u ricordu di e spere d'u mondu

Prima eranu voli è sogni in spartera
Eppo inverni dolci ignurandu e cutrure
Eranu celi puri spruvvisti di ventera
Eppo eranu pace è unione sicure

A mio strada fù chjara è ora s'annegrisce
Aghju vistu l'incantu d'un' alba chì fiurisce
Passendu

A notte si cunsuma tutte e nostre storie
A vulintà di ferru diventa arrughjinita
Ladra di luce viva pigliata à e memorie
E ferma in daretu ghjornu cum'è scunfitta

Eccu digià in noi 'ssi cheti abbandoni
'Ssi rinuncii indegni 'sse fuge inaspettate
L'alma summersa da sintimi pauroni
rinuncia à ciò chì ùn seremu mai stati

A mio strada fù chjara è ora s'annegrisce
Aghju vistu l'incantu d'un albore beatu
Affacassi i culori d'un veranu bramatu
Passendu

scrittu inspiratu da l'opera di JJG/En Passant

CHì seRia senZa tè

2011-05-07T08:10:00.023+02:00

Chì seria senza tè, tù chì veni à lu mio latu
Chì seria senza tè ch'un valdu addurmintitu
Ch'una stundarella appesa à l'arillogiu piantatu
Chì seria senza tè, ch'un fiatu amutulitu

Aghju imparatu di tè sin'à sorte umana
Vistu attraversu tè svanisce si i misteri
Aghju imparatu di tè cum'è sete à a funtana
Cumu omu leghje in celu issi mondi furesteri
Cumu di quellu chì passa si seguita l'andatura
Aghju imparatu di tè sin'u sensu di frizzura

Chì seria senza tè, tù chì veni à lu mio latu
Chì seria senza tè ch'un valdu adurmintitu
Ch'una stundarella appesa à l'arilogiu pientatu
Chì seria senza tè, ch'un fiatu amutulitu

Aghju imparatu di tè anc'appena di me stessa
Chì ci sò celi turchini éppo ghjorni di chjarezza
Chì l'accunsenti ùn sò micca una futile prumessa
M'ai datu la to manu in stu mondu d'amarezza
Quì duvè si sò scurdati ciò chi hè di campà inseme
M'ai datu la to manu colma di millanta speme

Chì seria senza tè, tù chì veni à lu mio latu
Chì seria senza tè ch'un valdu adurmintitu
Ch'una stundarella appesa à l'arilogiu pientatu
Chì seria senza tè, ch'un fiatu amutulitu

Quellu chì parla di gioia a face u sguardu tristu
Cum'è sè fussi rimpientu azzicatu d'illusione
cum'è corda sprangulata di un tintu chitarristu
Eppuru eiu a vi dicu ch'ell'esiste a passione
Aldilà di ogni sognu cum'è tesori cresciuti
Terra terra eccu i so mari scunnusciuti

Chì seria senza tè, tù chì veni à lu mio latu
Chì seria senza tè ch'un valdu adurmintitu
Ch'una stundarella appesa à l'arilogiu pientatu
Chì seria senza tè, ch'un fiatu amutulitu

(assai) libera adattazione
Que serais-je sans toi / L. Aragon

È quì Sò

2011-03-16T09:11:00.030+01:00

È quì sò
Filetta è trifogliu
Finiccia è arbiglia
Nulla chì spampiglia
È quì sò
Onde inticcia’scogliu
Ma nulla c’o vogliu
Chjamà maraviglia

È quì sò
Muschi di viranu
Un chjassu da fà
Un focu à scaldà
È quìì sò
L’ore chì si ne vanu
Un cennu di manu
A simplicità

Dillandi à tuttu, dillandi à mè
Hè custì chè tù sì ind’è tè
Da duve ti ne vai, à circà un vultà
È ogni eternità…

È quì sò
Vechji è zitelli à cantu
A casa d’una dea
È po una buttea
È quì sò
À dorme in Campu Santu
Tante strisce d’un cantu
È ‘ssa prufonda leia

È quì sò
Una piccula scola
E so panche di legnu
Un vechju impegnu
È quì sò
Un ricordu, una fiura
Cum’un ingermatura
U to core chì vola

Dillandi à tuttu, dillandi à mè
Hè custì chè tù sì ind’è tè
Da duve ti ne vai, à circà un vultà
È ogni eternità

È puru in tarra brusgiata, ci si nasce u viranu
Cum’è a strana addunita d’un omu è di l’oceanu
Puru s’è Natura ingrata ci priva di i so frutti
Emu sempre ‘ssu bisognu d’esse abbramati da tutti
È u so core feritu ne porta tante vinice
Cum’è quandu una mamma d’esse fiera face nice

Dillandi à tuttu, dillandi à mè
Hè custì chè tù sì ind’è tè
Da duve ti ne vai, à circà un vultà
È ogni eternità…
Libera adattazione di "Il y a" - JJ Goldman
JeanYves Acquaviva - Angélique Bazziconi

SenZa saPè

2011-03-14T13:52:00.017+01:00

A sò chì mi fermerà stu lume
Mi fermeranu acqua è ventu
Sogni arinati cum'è sciuma
È u core in pena pè mumentu

A sò chì mi fermerà stu cantu
Èppo u ricordu d'un surisu
A sperenza d'un ultimu stantu
Eppo e spere di paradisu

Eppo fermerà cio ch'omu custudisce
Senza vulè senza pensà senza sapè
À campà tropu forte a vita si finisce
Senza vulè senza pensà senza sapè

A sò chì mi fermerà silenziu
È 'sse stonde di malincunia
Mi fermerà stu tristu licenziu
E qualchi orma di puesia

Mi fermerà qualchi cusarella
Un ritrattu di noi strappatu
E parolle una musichella
Un ripigliu giammai scurdatu

Eppo fermerà cio ch'omu custudisce
Senza vulè senza pensà senza sapè
À campà tropu forte a vita si finisce
Senza vulè senza pensà senza sapè

Mi ScRivu

2010-11-21T22:53:00.010+01:00

Sculpiscu un fogliu di vita
Mi ne servu cumè sè fussi ramu
Ci sumengu piacè
U ricopru di l'anni
L'appaghju incù veranu
U raspiu di notte d'invernu
U rodu di viotu, U rodu d'affannu
Mi ci facciu una piazza bianca
Eppo l'assaltu di negru
Avanzu di pena in turmentu
Ci solcu mughji vani
U mengu à colpi d'emuzione
l'intazzu
Pè cuntradì u tempu
Mi scrivu pè campà
Libera adattazione di "Je m'écris" di Andrée Chedid

U Vestitu Biancu

2010-10-25T14:26:00.011+02:00

À tutte e Joanna d'issu mondu..

Forse stu sonniu era scemu è albasgiosu
D’un Principe di fole biondu è curagiosu
D’un’omu passiunatu custì à lu to fiancu
D’un’annellu d’argentu è d’un vestitu biancu

Era cusi assurdu di crede à ‘sse cose
Di crede chì l’amore campa à porte chjose
Chì mai ùn ci pò entre a viulenz’ è u peghju
Chì i Principi sò innati à u stirpeghju

U to vistitu biancu oghje hè un lenzolu
Sopra à tè i t’amichi di capu ind’un fazzolu
Forse anu fattu nice d’un vede iss’affanu
Ognunu la so storia è ognunu u so dannu

Forse stu sonniu era scemu è albasgiosu
D’una vita nurmale, di spartera è di gioia
Seguita la to cascia trista è silenziosa
A zitelletta sola, a zitelletta toia

Ti lasci s’anghjulella ch’ùn ghjunghje à capì
Ciò chi si passa oghje, ciò chì si passa quì
Addiu cara meia ti pregu più furtuna
Pè vighjà nant’à tè implureraghju a luna

Quallandi

2010-10-15T15:36:00.016+02:00

Ci sò l'anime perse d'un pudè si tuccà

Ci sò e mani afflitte d'un pudè si più stringhje

Ci sò sorte straziate d'un pudè si amà

Lumere eppuru sode chì u destinu spinghje

Quallandi,
Aldilà di lu mare, francatu e muntagne
Dopu ave traversatu i fiumi è e fureste
Quallandi,
Duvè le notte sò più longue è piu pagne
È chì ancu lu ghjornu di negru si riveste
Quallandi,
In issu nordu grisgiu più tristu chè l'infernu
Duve lu fretu vince u sole chì si more
Quallandi,
Duve ogni stagione sumiglia à l'invernu
Ci campa un zitellu chì mi ferma in core

quallandi

Un Chjassu

2010-10-04T08:44:00.009+02:00

Ùn sò qualessu hè u chjassu
Perchè chjassu è viale
Sò i dui di terra,
Ciò chì conta hè d'avanzà ;
M'impippu di sapè chì a strada si perde
Viaghju listessu
È viaghjandu, campu!
Cusì, incu a cunniscenza di ciò ch'aghju bramatu,
Mi nè vò caminendu versu ciò ch'aghju digià
È a socu ch'ùn l'averaghju più

libera adattazione di l'opera di F.Pessoa 09-10

Rapale

2010-09-28T16:08:00.006+02:00

Appesu nant'un rione

Da i seculi zuccatu

Di li mei lu bastione

Di u s'amore impastatu

Hè in la to pace rara

Ch'ella dorme Mamma cara

Rapale © 09-10

Ferma tantu à fà

2010-09-16T09:18:00.021+02:00

Quandu i penserai spenti tutti i fochi di tandu
È s'ellu ti ferma ùn ghjornu poca brama di fà stantu
Pè ste stonde forse à vene mille speme oghje ti mandu
Chì pè ogni passu à fà ti steraghju sempre accantu.

Seraghju in la to mente issa forza immateriale
Quella chì sempre ti punta pè chè tù avanzi torna
Quella chì di lu to chjassu nè ferà un grand' viale
Quella chì ferà fullena di cio ch'ora ti frastorna

Seraghju in la to notte issa calma vucerella
Chì s'ostina sempre sempre à dà ti dinù curagiu
È di l'alba à lu vesperu ti sterà sta musichella
Per di li to fochi spenti fà sbuccia un novu ragiu

Ti nè faciu ghjuramentu di vince cù tè stu dannu
A sapemu tù ed eiu ch'è u pudemu stirpà
Li feremu fronte insseme a to manu in la mio manu
Pè vive la nostra vita duve ferma tantu à fà.

Angélique Bazziconi/Eric Gineste/Anna Rocchi

Ferma tantu à fà © 09-10

Andà

2010-08-12T09:23:00.014+02:00

Andassine culandi, francà u mare... Andà
L'Orizonte più grande, u Celu immensità
Anu issu bisognu d'altrò è di luntanu
Anu tutti 'ssa brama quelli chì si ne vanu.

Ma cosa serà chì ci face vultà ?

Andà © 08-10

Versu mè

2010-07-22T11:52:00.028+02:00

Vulerebbe purtà ti nantu à le mio strade
Duvè sò le mio brame è paure piattate
Duv'ellu ci hè dinù qualchì orma di tè
Vulerebbe purtà ti appena versu mè

Versu mè c'hè vaghjime cum'eterna stagione
U mei lu veranu ùn hè chè illusione
U ventu di sittembre ci batte à più pudè
Inganna li mio sogni è si ride di mè

Versu mè sò le spere d'un sole insischitu
Versu mè sò le fiare di un focu spavitu
Versu mè sò vascelli andati à malavia
I sempiterni chjassi di la malincunia

Versu mè sò le sponde suminate di versi
Spiritate da l'ombre di li m'amori persi
Un inchjostru tristizia mi corre in le vene
Ci ciottu piuma bianca pè scrive le mio pene

Versu mè c'hè a notte stellata di parolle
Certe sò troppu dure d'altre sò troppu frolle
Sè tù ci voli vene t'aghju insignatu a via
L'aghju tracciata eiu cù la mio puesia

Versu mè sò le spere d'un sole insischitu
Versu mè sò le fiare di un focu spavitu
Versu mè sò vascelli andati à malavia
I sempiterni chjassi di la malincunia

Versu Mè © 07-10

Un Passu

2010-06-18T12:18:00.044+02:00

Da una via sprufundata
À una strada accunciata
Dà u celu foscu è scuru
À u lume chjaru è puru
Da tutte le difficultà
À u semplice di campà

Da quì à custì c'era solu un passu..

Da ciò ch'o ti vulia dì
À ciò ch'ellu si pò capì
Dà ciò chi a parolla abbughja

À ciò chì u silenziu mughja
Da ciò ch'o ti pudia dà
À ciò chì si pò accettà

Da quì à custì c'era solu un passu..

Da lu negru di a sulezza
À lu biancu d'una carezza
Da u vanu d'una prichera
À tante brame di spartera
Da tutti si filari persi
À a vittoria d'ogni versu

Da quì à custì c'era solu un passu
Da quì à custì, C'hè mancatu pocu

Ma hè cusi..È mi ne vocu

Un Passu © 06-10

Amicizia Pruibita

2010-06-12T18:23:00.027+02:00

T'anu insignatu da zitellu
Ch'ell'ùn ci vulia ghjucà
Incù 'ssa grana di ribellu
Chì per avà era chjuca
Ma chì serà prestu in età
Di nuce à a sucieta

T'anu dettu "tù si sferente
Tù si di più civilizatu
Lascia le corre isse ghjente"
Ma tù ti si avicinatu...
...Pudia purtà tantu male
Quellu ch'à tè paria uguale ?

Allora senza sta à sente
I serenati è e lezzione
Senza mai tene à mente
'Sse falze ricumandazione
Ti si ligatu d'amicizia
Senza teme alcuna malizia

Ùn si misura l'affezzione
À u culore di a pella
Ghjè a to più bella lezzione
Pettu à a sorte crudella
A fiancu à l'altru site stati
Mentre trent'anni sò passati

Ùn vale micca à ghjudicà
Annantu una sola idea
È vale ancu menu uddia
Quandu si pò tesse una leia.
..Oghje u t'amicu più fidu
Hè quellu ch'era pruibitu

Amicizia Pruibita © 06-10

Crede

2010-06-04T12:55:00.035+02:00

A meia la bandera hè stampata di tè
Di ciò chì m'ai datu è chì si sta in mè
Sbattuleghja à li venti graziosi è altieri
Eppo mi dà 'ssa forza pè spulà i penseri

Eppuru tù di mè ùn la sapesti mai
Quantu fubbenu dure isse stonde di guai
È quantu avà sempre sò duri à supurtà
Sti mumenti sulezza in lu meiu u campà

Ma tutta la putenza di lu mio tengu caru
Hè una dolce fede mischjata incù l'amaru
Chì sbattuleghja anc'ella dentru à lu mio core
Dendu mi a cetrezza chì l'amore ùn pò more

N'aghju campatu ore più dure chè cusì,
Ma fra danni è pene mi sò firmata quì
È oghje , sempre fida à s'amore per tè
Tengu sempre una spera radicata in mè

Forse u ventu un ghjornu serà un po'più forte
È di la mio sperenza sbatterà ogni porte
Forse un ghjornu un focu brusgierà 'ssa bandera
È lascierà fulena di tuttu ciò chì era

Ma ora 'ssa timpesta ùn hè ancu à vene
È nimu pò sapè ciò chì serà l'avvene
Sbattuleghja in mè un amore arcanu
Chì pianu accarezza un soffiu di veranu

Crede © 06-10

U Ritrattu

2010-05-18T23:04:00.041+02:00

S'hè appesu un mumentu
À lu tempu arrubatu
È tuttu d'accunsentu
Pare cumè firmatu

Pare cumè firmatu
In un soffiu immurtale
Nant' a carta stampatu
Luce tal'un fanale

Luce tal' un fanale
È guida la mio mente
Chì voga senza male
Versu 'sse sponde quente

Versu 'sse sponde quente
Duvè lu silenziu sta
Fiancu à 'sse surgente
Chì nunda ùn pò siccà

Chì nunda ùn pò siccà
Chì empien' u circondu
Sumente d'eternità
Nant' à lu nostru mondu

Nant' à lu nostru mondu
Chì hè mischjatu ora
Di brunu è di biondu
Eppo di luce mora

Eppo di luce mora
Di negru è di biancu
Tralucenti culori
Chì mi stanu à fiancu

U Ritrattu © 06-10

Noi

2010-05-16T14:48:00.017+02:00

Di u peghju di e stonde pè duve sò passata
È chì sempre steranu stampate in lu mio esse
Fermanu puesie di vita palisata
Una leia frà noi ch'aghju vulsutu tesse

Tuttu ciò chì ferisce l'esse di u pueta
Tutte l'intime ore spugliate di l'orgogliu
A sera in furore è a matina cheta
Sò guai universali stracquati nant'un fogliu

Simu tutti listessi, è sò cusì anch'eiu
Avemu 'ssu bisognu d'amore è di spartera
U vostru negru pagnu s'assumiglia à u meiu
Cum'è u vostru lume sumiglia a mio lumera

Eppuru in fondu à noi ci sò sintimi ascosi
Brisgiuli di pudore ch'ùn si ponu cuntà
Allucati in lu core cum'è soffii preziosi
Chì ci aiutanu tutti à pudè avanzà

Noi © 05-10

Brame zitelline

2010-05-14T17:44:00.016+02:00

Qand'un ochju zitellinu agguardà l'immensità
I chjassi versu dumane diventanu armunia
Inchjappittati d'amore di fede è di libertà
D'orizonti senza fine cresciuti in lu sunnià

S'alzanu li so castelli mezu à un mare turchinu
Incù muri di bambace scialbati di la so risa
Pace è serenità steranu sempre vicinu
D'issu tempiu di nucenza duve u sole s'aisa

Campanu sempre in mè s'illusione zitelline
Citatelle imaginate brame linde è spenserate
Mezu à 'ssu mondu di guai è di gioie andarine
Tengu un cantu ascosu duv'elle sò suminate

Brame zitelline©05-10

Piove

2010-05-11T10:08:00.006+02:00

Millaie di gocciarelle
Cascanu da u supranu
Sò cume tantu granelle
Chì sumenanu veranu
Mentre tù ùn ci si più
U tempu corre dinù
Falanu una à una
Nant'u marmuru zuccatu
Ùn nè fermera nisuna
Quandu u sole alzatu
Incù spere dilicate
Cunsumara 'sse strisciate

Piove©05-10

Canta Viulinu

2010-04-29T13:04:00.015+02:00

Si tace u rispiru mentre canta Viulinu
U silenziu ascolta accuncià si a vita
Tandu di core sbuccia sintimu andarinu
Cum'un soffiu di pace chì esce di ferita

L'archettu hè cambiatu in mazzetta di fada
Quand'ellu accarezza e corde addurmintite
Cresce l'armunia frolla è dilicata
Cusgendu à la mente 'sse note culurite

A musica di té invadisce lu mondu
Da fà ride u sole, accende si u celu
Di core di viulinu è d'estru vagabondu
Da supranà a terra in ballu cù l'accellu

Da fà cantà
Da fà amà
Da fà trimà
Da fà campà centu passione
In li versi d'una canzona.

Canta Viulinu © 04-10

A Croce

2010-03-24T21:54:00.039+01:00

Veghji quì, sintinella, di ferru è di legnu.
Testimonia di storia, alzata versu u celu.
In issu santu locu t'hà postu un omu degnu,
È forse à lu to pede ci dorme un'anghjulellu.

Silenziosa vistiga di lu tempu chì corre,
S'avvicina di tè certe volte l'altagna.
Da quaiò, ogni ghjorni, ti saluta u pastore,
Guardiana misteriosa di l'arcana muntagna.

So passati cent'anni senzà rompe ti mai,
Serà ciò chì serà, un azardu o un segnu...
Corre è vola u tempu è diritta tù stai,
Veghji quì sintinella di feru è di legnu

Radicata à li scogli, sott'u sole ardente,
Testimonia di storia, alzata versu u celu.
So tesi li to bracci d'oriente à punente,
È forse à lu to pede ci dorme un'anghjulellu.

A Leia

2010-03-01T13:17:00.032+01:00

Hè a to manu soda quand'ùn aghju più forza
Chì mi dà 'ssu curagiu d'avanzà torn'appena
In ciò chè tù si tù trovu la mio risorza
Chì mi salva è m'aiuta à vince la mio pena

A to voce si tace, u to sguardu mi dice
Quant'elle sò sprissive 'sse stonde di silenziu,
Parlanu senza dì, ricattanu e venice
Sò nude, sò spugliate, senza alcunu artifiziu

Pianu pianu a to vita si nasconde à la meia
Aduniti nè simu cum'è sole è albore
Più forte chè u sangue cresce la nostra leia
Un libaru accunsentu più forte chè l'amore

Sò arcane s'unione chì vincenu a tristizia
Isse putente fune frà duie alme colme
Chì certi in issu mondu chjamanu "amicizia"
Ma chì sempre per mè purteranu u to nome

A Scelta

2010-02-16T08:24:00.066+01:00

S'ell'hè di core a to strada
Sè tù ne si sicuru
S'ell'hè di pace accunciata
Frà u chjaru è u scuru
Sè a to scelta hè misurata
Allora vai puru..

Ùn ti possu ritene quindi vicinu à mè
Vai puru à corre versu le to cunfine
Periculose vie mischiate di piacè
Ti chjama lu misteru d'isse strade divine
Chì aprenu lu core più ch'ùn a possu fà
Chì forse amanu megliu chè eiu sò amà

À 'ssu puntu di vita hè ora di sapè
Qualesse so e brame chì ti facenu move
Qualessa hè la ghjente chì s'asumiglia à tè
Senza avè bisognu di circà ne e prove
A toia a vuluntà ùn a possu parà
È di più chè cusi ùn ti possu spiegà

In la to vogulera sè un ghjornu si stancu
Eppo s'ellu ti pare chè tù ti si sbagliatu
S'ellu ti pare vanu ciò chè tu ai à fiancu
È chì in fondu à tè ti senti tralasciatu
U rimorsu sera u Rè di la to vita
È u rimpientu l'Ombra, chì sempre ti seguita

Ma,
S'ell'hè di core a to strada
Sè tù ne si sicuru
S'ell'hè di pace accunciata
Frà u chjaru è u scuru
Sè a to scelta hè misurata
Allora vai puru...

A Scelta © 02-10

Cresce

2010-02-14T20:44:00.033+01:00

U meiu l'universu rispira A Canzona
Nata da 'ssu talentu cresciutu di passione
Ribomba in lu mio esse a dolce meludia
D'isse parolle scelte rimate incù magia

A Lu Ghjornu Spuntatu nasce tant'armunia
Di musica intricciata incù a puesia
Annannate in li bracci di un cantu supranu
Di versi è di voce chì portanu luntanu

In la Muntagna Chieta serene Passighjate
D'Oddiu, di Carezze di Sognu imbulighjate
Vi piglianu lu corpu l'alma eppo u core
Messaghji di rivolta di pace è d'amore

D'issi Cenni di Vita, Di Mele è Di Sale
Mi ne Vocu anc'eiu liberata di male
Tandu Scrivu u sole chì illumina l'alba
È cresce in lu mio ortu un fiore di Vitalba

À Vitalba, in amicizia è cù tamanta ammirazione

02-10

Mi Stai

2010-02-14T00:43:00.018+01:00

I palesi i più duri à la mente inchjudati
Cun punte arrughjinite di pienti scunsulati
Messaghji tantu vani à lu ventu mandati
Spapersi in lu niente, è pè sempre scurdati.

In lu sprufondu viotu sentu a meludia
D'un viulinu spanatu chì pienghje u m'Amore,
Seguita li mio passi Zià Malincunia
Quella fida cumpagna di tutte le mio ore

Mi ne vocu pè sempre nantu à d'altre sponde
Lasciu daretu à mè sti pezzi di passione
Quì ùn c'hè più nisunu chì mi possa risponde
Tuttu ciò chì cridia, eranu illusione.

Sulezza,
Cum'è una fatalità
Tristezza,
Cum'è un filu di vita,
Sta pace chì ùn vene mai,
È tù, tù chì à mente mi stai.

Mi Stai © 02-10

Una Vita

2010-02-11T05:21:00.035+01:00

E notte senza dorme, i ghjorni senza ride,
Incù solu cumpagnu 'ssu sintimu sbagliatu.
Tante parolle scritte, triste è sculurite,
Viote di li culori chì u tempu hà pigliatu.

Fermanu 'ssi dubiti chì rodenu a vita,
L'ombra di li mio eri nantu à li mio oghje.
Evidenze di lotta oramai finita,
È 'ssu core in pezzi ch'ùn ti possu più porghje.

Fermanu e questione state senza risposte,
U desideriu scemu di pruvà di rifà,
E brame di tè stessu, e certezze supposte,
È 'ssu sintimu scuru d'avè più nunda à dà.

Fermanu qualchì fiure, testimogne di carte,
Ruvine di passatu annantu à li mio pienti,
Eppo u gustu amaru d'un amore chì parte,
Lascendu ci scurdà i più belli accunsenti.

Mi ferma un sguardu tristu stampatu in lu mio spechju,
Cum'è i gattivi sogni ch'ùn si ne vanu più,
Tuttu in giru a mè mi pare troppu vechju
Ma rinnovu a sò ch'ùn ci ne serà più.

Avia una vita, l'aghju lasciata corre,
Ora hè troppu tardi pè pudè la achjappà,
Una vita guastata d'avè troppu timore,
Da duve eiu ora, ùn possu più scappà...

Una Vita © 02-10

Musica Eric Gineste

Sguardu

2010-02-07T20:58:00.031+01:00

U mio sguardu pisatu versu lu to celente
Scrivia lu to nome à l'inchjostru di stelle.
A luna d'accunsentu u tenia à mente
Vighjandu nantu a pace di quiete sintinelle

A notte m'hà purtatu centu brame bullente
Suminate in mè cum'è linde acquarelle,
Ma l'astu di lu sognu à spessu hè nucente
Quantu e realita sò à spessu ribelle

Da tandu ogni sera guardu in vanu u celu
Or'mai ricupertu d'un tristissimu velu
Chì nasconde 'sse spere spente una à una.

Pè sempre hè sguassatù ciò chì fù senzà esse
So gattive 'sse stonde chì a vita maltesse
Issi scontri spaviti ch'affuscanu a luna...

Sguardu © 02-10

L'Alburi Feriti

2010-01-30T16:27:00.026+01:00

So scritti tutti 'ssi nomi
Isse brame di dumane
Nanta Querci eppo Olmi
Zuccate da centu mane

So prumesse cusì frolle
Nanta Platani è Noce
So millaie di parolle
Tanti cori, tante croce

Spiritanu l'albitreccie
'Ssi fandoni bugierdelli
Nanta Castagni è Leccie
Stampati cù i cultelli

Prumesse di matrimoni
In a curteccia sculpite
L'alburi so testimoni
Chi tenenu 'sse ferite

Testamenti d'illusione
Nanta platani è noce
So venice di passione
Tanti cori, tante croce

Eppur'eranu sinceri
Issi scritti sminticati
Ma l' amori vivi eri
Ora sò più chè passati

L'alburi Feriti © 01-10

Musica Micheli Solinas

Nanta un Sonu d'Urganettu

2010-01-24T16:53:00.023+01:00

Mi rimbomba in capu un sonu d'urganettu,
D'amicizia tamanta di spartera, d'affettu,
Mi ramentu li balli è le veghje beate,
'Sse care serinate di ghjuventu passate.

I canti è e risate tuccavanu e stelle,
Asti di Libertà è di spere nuvelle,
Eramu aduniti da listesse primure,
Di passione sincere è di fede e più pure.

Rifaciamu u mondu, a la nostra manera,
Sperenze suminate à orlu di bandera,
Sopra lu filu tesu d'un avvene stampatu
Nanta ciò chì li nostri ci avianu lasciatu.

Corre corre la vita è porta in la so corsa
'Ssi mondi suniatti di vintannina scorsa.
U sonu d'urganettu ferma in un passatu
Chì s'ha tenutu un pocu ciò ch'ellu avia datu.

Alzà ti ghjuventu, rifiatà ti è canta,
Tramanda issu spiritu di purezza tamanta,
L'urganettu si tù a tene lu oramai,
Fà chì lu nostru cantu ùn si tacessi mai.

Nanta un Sonu d'Urganettu © 01-10

Ella

2010-01-22T19:58:00.024+01:00

Duve ombra è lumera u celu imbuleghja,
Mischiandu le so sorte in una sola pella,
À 'sse strane cunfine duve lu grisgiu veghja,
Hè 'ssu mondu luntanu, hè 'ssu mondu a ella.

Infila le so ore è ne face cullane,
Di perule di male, di perule di bè,
Di perule di stonde palisate o arcane
Ch'ella prova di sparte certe volte cù mè.

Ma eiu cosa so di pettu à 'ssu misteru ?
Ùn aghju issa chjave pè apre lu so mondu..
U so esse, à lu meiu, serà sempre strangeru,
Eppuru a tengu cara in u mo più prufondu.

Duve ombra è lumera u celu imbuleghja,
Mischiandu le so sorte in una sola pella,
À 'sse strane cunfine duve lu grisgiu veghja,
Hè 'ssu mondu luntanu, hè 'ssu mondu a ella.

Ella © 01-10

Angélique Bazziconi / Michel Solinas

Mare di Ferraghju

2010-01-17T15:17:00.017+01:00

Ùn mi ferma più nunda à fiancu,
Sogni è sperenze ch'eiu aghju
Sò cum'è marosulu biancu
Nanta le sponde di ferraghju.

Più nunda ora ùn rasserena
Ciò chì pianu l'onda ricopre.
I passi persi nant'a rena

Quant'elli mi facenu soffre.

Ùn mi ferma più nunda a fiancu,
Sogni è sperenze ch'eiu aghju
Sò cum'è 'ssu battellu stancu
Nanta lu mare di ferraghju.

Davanti, tuttu si svanisce,
Sott' u celu chì si scadena
Sguassendu tutte isse strisce
Senza pudè sguassà a pena.

Ùn mi ferma piu nunda a fiancu,
A sola fiura ch'eiu aghju
Ramenta un amore tamantu
Seppellitu sott'à ferraghju.

Mare di Ferraghju © 01-10

Favula : U Prunu è u Fiore

2010-01-13T13:21:00.013+01:00

Una fresca matina à l'alba insunnulita
S'apria à la vita un fiore maestosu
D'issi fiori chì anu 'ssa bellezza infinita
Chì u mondu à l'intornu ne diventa ghjelosu.

À cantu c'era un prunu, vechju, goffu è malatu,
Paria ancu gattivu, in somma era schifosu.
Di lu fiore sentia u muscu prufumatu
Ignurendu chì quellu era tantu orgogliosu.

Iè, s'ellu era bellu, era dinù meschinu,
Invece chì lu prunu avia l'alma pura.
Era ancu più gattivu ch'ellu era divinu :
Quessi sò li azardi di la cara natura...

-"Eiu i prunicaghji, li metterebbe focu,
Ùn portanu ch' affanni, guai eppo dulori !
Ma eiu, cusì bella, posta in questu locu,
U facciu risplendisce da tutti i mio culori"

È cusì ogni ghjornu, u fiore canzunava
U nostru tintu prunu, ellu, fermava zittu !
U fiore canzunava è u tempu passava
Fin' chì una matina ùn tenia più arrittu !

Tandu si mette à pienghje è à chjamà succorsu
Ma issu fiore chì more ùn hà manc'un amicu
Vene tardi u rimpientu di lu soiu u discorsu
Eccu ciò ch'ellu hè di guardà si u billicu

- "Han han ! Madamicella ! disse u prunicaghju,
di la vostra bellezza ùn ferma chè fulena !
Di sicuru sò goffu è goffu firmeraghju
Dunque di vene vizzu à mè ùn ferà pena !

Voi erate bella, ma solu d'apparenza,
Chì u vostru lu core era di li più brutti
Avà firmate in terra, senza una sperenza,
Mentre chì in issa terra sperghjeraghju i mio frutti"

D'una bella andatura o di un bel culore
A vi dicu, mi pare ch'ùn c'hè nunda à bramà
Ma siente chè vo site un prunu o un fiore
Vi lasciu sceglie soli una muralità!

U Prunu è u Fiore © 01-10

Evidenza

2010-01-08T23:22:00.029+01:00

A luna cù u sole, ùn si ponu tuccà,
Nè mancu abbraccià si l'alba incù a sera.
Nisunu mare mossu ùn si pò infucà.
Stellata à più pudè, a notte ferma nera.

Ùn mi possu risolve di pettu à l'evidenza.
S'ùn possu fà girà u mondu à l'arritrosa,
Si a fatalità asconde a penitenza,
Eiu vogliu pruvà di fà la menu umbrosa.

Cusì corre la sorte, cusì corre la vita:
Tutti i nuli un ghjornu i si porta u ventu,
Ind'u so soffiu caldu di pace infinita,
Fiatu di fede linda chì cunsuma u pientu.

Corre dinù 'ssa fede da fà si abbraccià
A luna cù u sole, l'alba incù a sera.
Basta à crede ci forte è mai rinuncià,
D'una vita sunniata, fà una vita vera.

Evidenza © 01-10

Fermerà

2009-12-26T20:34:00.027+01:00

Veneranu altri mumenti... a vita corre
Venerà un altru surisu, un altru amore
Nascerà a primura dopu l indifferenza
Ma nunda ùn venerà pè riempie l'assenza.

U silenziu stancatu, ghjunghjerà u rimore,
Ricordi nancu nati bramanu le so ore,
L'avvene chì ci aspetta cu tamanta pazienza
Ùn ci puderà mai fà smenticà l'assenza.

Passeranu inverni, passeranu verani,
Stagione éppo stagione, passeranu cent anni.
Passerà issu tempu chi appacia a suffrenza.
Ma ùn passerà mai 'ssu sintimu d'assenza.

Dinù si piserà u ghjornu, à l'infinita,
Affacarà a sera, a notte chì seguita.
Venerà l'adisperu, éppo torna a sperenza...
Venerà ciò chì vene ma fermerà l'assenza.

Angélique Bazziconi/Eric Gineste/Anna Rocchi
Fermerà © 12-09

Per tè

2009-12-20T08:57:00.018+01:00

Pè tuttu ciò chì ti frastorna
Per isse gioie indurmintite
Ch'è tù e possi gode torna
È campà dinù centu vite
Pè ciò chì ferma d'isse stonde
Pè quelle perse nant'à l'onde

Per ciò chì ùn hà impurtenza
Pè 'sse parole senza sensi
Pè ciò chì pò esse sperenza
È per tuttu ciò ch'è tù pensi
Pè li to secreti i più strani
Ch'è tù teni in le to mani

Pè tutti i silenzii pisivi
Pè 'ssa parolla troppu scritta
Issi dulori cusì vivi
Pè ista fede sempre arritta
Eppo per ciò ch'è tù sì tù
Eppo ancu per mè, dinù

Pè 'ssi dubiti, 'sse questione
Pè tuttu ciò ch'ùn ti palesu
Pè 'sse matine d'illusione
Isse serate u core appesu
A ciò chì ne sera l'avvene
Pè u to sognu chì si svene

Pè ciò chè t'ùn si mai statu
Pè ciò chè t'ùn serai più
Pè lu tempu chì hè passatu
Pè l'alba di s'altru principiu
Ch'ella sippia cum'una spera
Per tè sta sera ista preghera..

Per tè © 12-09

Scrivu

2009-12-14T19:11:00.009+01:00

A mio manu sguilisce, è l'inchjostru seguita,
Stampendu isse parolle una à una assunte.
E mio ore à palesu, cum'è spechji di vita,
Brame di libertà chì mai ùn sò ghjunte..
Scrivu, scrivu, è mi salvu.
Scrivu, scrivu, è mi tombu.

Ste cunfessione colme di u mo esse feritu,
E scrivu assai megliu ch'ùn le sò prununcià.
Pagina dopu pagina, rileghju ogni scrittu,
Cum'è stofe strappate ch'ùn possu riaccuncià..
Scrivu, scrivu, è mi salvu.
Scrivu, scrivu, è mi tombu.

Una manu vi scrive è un core vi dà,
È vi portu in mè pè sparte ogni stonde,
Cù un scrittu arcanu chì una musa guida,
Ancu sì certe volte, ùn capiscu, d'altronde.
Scrivu, scrivu, è mi salvu.
Scrivu, scrivu, è mi tombu.

Scrivu © 12-09

Mi N'Anderaghju

2009-12-05T13:55:00.020+01:00

Quandu ùn'averaghju più forze, pè fà nice d'esse felice,
Ch'ùn puderaghju più piattà, a strisciata di le venice,
Ch'ùn averaghju più parolle, pè risponde à tante questione,
Chì serà svanita la voglia di crede à troppu illusione,

Tandu mi n'anderaghju....

Mi n'anderaghju sola, colma di dilusione,
Perde mi pè sti lochi, senza destinazione,
A mio strada serà quella di un azardu.
Ùn avè mai più duve sceglie un latu.

Quandu ùn'averaghju più fede, pè crede chì s'arrangerà,
Ch'ellu serà persu pè sempre, u soffiu di la mio preghera,
Ch'ùn averaghju più a forza di ripete listessi affari,
Ch'ellu si serà sminticatu u sensu di li mio filari,

Tandu, mi n'anderaghju....

Mi n'anderaghju sola, senza vultà mi mai,
Perde mi pè sti lochi liberata oramai,
A mio strada serà a prima chì mi vene,
Ùn avè mai più à teme ne l'avene.

Quandu si serà spenta in mè l'ultima stella,
Ch'ùn seraghju più nunda, nè mansa, nè ribella,
Chì si serà svanita tutta a mio vuluntà,
Ch'ùn n'averaghju più u laziu di luttà,

Tandu, mi n'anderaghju......

Mi n'anderaghju sola, colma di dilusione,
Perde mi pè sti lochi, senza destinazione,
A mio strada serà quella di un azardu.
Ùn avè mai piu duve sceglie un latu.

Mi n'anderaghju © 12-09

Banditu di Parolle

2009-12-04T18:09:00.009+01:00

Oghje disprezzi a ghjente di la mio isulella,
È sputi u to velenu in faccia di li mei,
Sò omi cum'è tè ch'anu cusgitu a stella,
Nant'à i panni frusti di millioni d 'Ebrei...

U razzistu sì tù, sì tù u terruristu,
Banditu di parolle dette pè fà mi male,
Ti credi più supranu, ma ùn ti sì avvistu
Chì lu toiu u discorsu, hè guastu, è pocu vale.

Cì trati di baschicci, eccu u to parlatu !
U meiu u linguagiu hè assai più grande,
I mio cari antenati u m'anu insegnatu.

Dettu n'aghju abbastanza hè megliu ch'o ti lachi
Chì per parlà di tè a puesia ùn sende
Ferma ancu troppu pocu di dì chè mi stumachi

Banditu di parolle © 12-09

Destinu

2009-12-02T13:22:00.005+01:00

Ùn ci sì solu tù cù l'anima ferita,
Ciò chì ti face soffre hè guaiu universale.
Avemu tutti in noi una storia finita,
Una venice aperta chì face tantu male.

A ti vulia scrive pè appaciatti un pocu..
Mi tocca di pensà ch'un omu possa pienghje.
A ti vulia scrive perchè eiu a socu :
Ancu puru a palesu u dulore ùn si spenghje.

T'assumigli à mè ed eiu t'assumigliu,
Ci capimu noi altri senza troppu parolle.
Purtemu u stessu pesu in lu nostru esiliu,
Somma di resti amari, ch'ùn si ponu ingolle.

Forse ci truveremu un ghjornu, o forse mai.
Ma ch'è tù sippia sempre, luntanu o vicinu,
A ti vulia scrive sperendu chì oramai,
Serà più generosu u nostru lu destinu.

Destinu © 12-09

Ricumpone

2009-11-29T15:12:00.001+01:00

In vittura, frà quì è altrò, Hè a fine di a notte.
Risonna nanta l onde stu cantu intesu ùn so quantu volte.
Davanti u to caffè ti metti à lacrimà,
A musica hè bella ma cusì falza la rima.

Ogni filare ricumpone,
Sta meludia ùn và cù i versi di sta canzona.
Ùn la sanu micca chì a storia hè passata ?
Ch' ella si n'hè andata ?
Ogni filare ricumpone.

A zitella pienghie so trè ore di mane
A butigliaccia d' alcolu strinta in le sò mane.
À pusà nant'à u letu. Passanu dinù sta canzona.
L'ultimu vichiere viotu sciapatu nanta a televisione.

Ogni filare ricumpone,
Sta meludia ùn và cù i versi di sta canzona.
Cume ponu cantà l'amore eternu è beatu ?
Ùn la sanu micca ch'ellu si n'hè andatu ?
Ogni filare ricumpone.

Eiu ci cridia tantu à sta sincerità,
È e parolle d'issu cantu parianu a verità,
Ma s'avia penna è fogliu, quì, avà,
A sò ciò ch'eiu vulerebbe fà :
Ogni filare ricumpone,
Sta meludia ùn và cù i versi di sta canzona.
Cume ponu cantà l'amore eternu è beatu ?
Ùn la sanu micca ch'ellu si n'hè andatu ?
Ogni filare ricumpone.
Ricumpone.
A sò avà chì tuttu hè persu.
Ricumpone ogni versu....

libera adatazione di
Unwrite That Song /Lynyrd Skynyrd

Sì, à Casu

2009-11-28T21:38:00.011+01:00

Sì, à casu, un ghjornu, leghji li mio filari,
Sì tù poi capisce a mio lingua straniera,
Sì tù poi perdunà mi sti mumenti amari,
Sappia chì in mè stessa ùn'e sò tantu fiera.

A sò chè eri tù a mio alma surella,
Sta certezza, ormai, affanna le mio ore.
Senza vulè dà capu à sta vita nuvella,
Aghju giratu u spinu è mi sò messa à corre.

È aghju corsu tantu, ch'infine, sò cascata.
Ne fermu sempre in terra, u core scalpighjatu.
Cridendu di salvà mi in s'ultima scapata,
Aghju, avà, u rimpientu d'issu tempu passatu.

Sì, à casu, un ghjornu, senti le mio parolle,
Sì tù poi capisce a mio lingua straniera,
Sté parte di mè stessa à tempu sode è frolle,
Alzate versu tè cumè una bandera.

Sì, à casu, un ghjornu, à l'alba d'un invernu,
Ti rivenenu in mente i mumenti arcani,
Si tù senti brusgià, in tè, un focu eternu,
Colmu di nostalgia è di sintimi strani.

Sì tù ne si capace è sì tù n'ai a brama,
Sapia ch'eiu t'aspettu, oghje rasserinata.
Ùn aghju piu stu pesu chì rode la mio alma..
..Stè parole ne so la schietta palisata.

Sì, à casu... © 11-09

d' Ellu

2009-11-25T21:51:00.006+01:00

D' ellu vogliu imparà ogni stonda, ogni ore,
E strade imbalsamate duv'ellu và à corre.
Vogliu cunnosce tuttu di tutte e so passione,
Fà chì le nostre vite diventinu canzone

Tene lu so rispiru à lu meiu appiccatu,
È mischià mi cun'ellu da perde ne u fiatu.
More in li so bracci, rinasce in le so mane,
Ch'ellu sippia l'autore di lu nostru dumane.

Impastà un amore più bellu è più forte,
Ch'ellu sippia la chjave da apre ogni porte,
Da scatenà mi, infine, di ciò chì mi ritene,
Pè girà mi cun'ellu versu un stessu avvene.

Cumpone, eiu è ellu, una vita nuvella.
Indè lu mio celente serà l'unica stella.
Vogliu imparà d'ellu tuttu ciò chì s'impara,
È in lu so campà, mette a mio vita para..

d'Ellu ©11-09

Vaghjime

2009-11-22T08:43:00.006+01:00

Sparti in la natura d'una manu fatata,
I culori di focu brusgianu lu mio core,
Vaghjime misteriosu, stagione tantu amata,
Maestru di lu tempu faci nice di more..

Sole, eppo acquate, stilpanu le to ore.
L'aria face ballà l'alburu maestosu,
Magia armuniosa d'issu ventu chì corre
Frà le fronde inacquate d'un ragiu luminosu...

Duve certi ci vedenu tristezza è spaventu,
Lodu la to bellezza chì tuttu in mè appacia.
Ind'un sintimu stranu di spusà ne u ventu,
A lu soffiu cutratu porghju pianu la faccia.

Cum'è à un amante, u mio esse offertu,
Mi nascondu cun tè è diventu vaghjime.
Ora possu vulà cù lu core apertu
È gode l ' armunia da la piaghja à le cime..

Vaghjime © 11-09

Musica Micheli Solinas
22/11/09

I Fiori di l'Eternu

2009-11-20T08:21:00.005+01:00

à mamma...

A rosula maestra di lu mio ortu chjosu,
Avia u prufume di la to pella d'oru.
M'imbalsamava u core stu muscu generosu,
Ùn ci n'era, per mè, più preziosu tesoru.

Cume pudia fà pè tene stu giuvellu ?
I fiori, a sapemu, campanu una stonda..
L'alba tradimentosa d'issu ghjornu nuvellu,
Hà invizzitu è tombu sta belezza prufonda.

Di tamanta armunia mi fermanu sumente,
U mo scopu, ormai, hè di fà le sbuccia,
Annacquate da l'onda d'una chjara surgente.

Ne chjamu à lu sole pè cumbatte l'invernu.
Davanti à lu Signore ghjurgu d'ùn rinuncià,
Di fà, d'isse sumente, un fiore à l'eternu..

I Fiori di l Eternu © 11-09

In Vanu

2009-11-16T12:06:00.002+01:00

Aghju digià luttatu contr'à tante timpeste,
Più nisuna ventera ùn mi pò fà piegà,
Frà tutte le lezzione d' infernu o celeste,
Fermanu pochi affari chè mi poi spiegà...

Forse mi poi dì ciò ch'hè sta gattivera
Chì l'omu pò produce di pettu à i sò pari,
Ma cosa pò sperà ? à cosa ghjuverà ?
Ùn hè megliu d'amà chè d'esse tantu amari ?

Aghju fattu le prove d'iss'odiu è d'iss'orgogli,
Chì m'anu resa soda, dura cumè sti scogli,
Chì anu sta presenza è stu passatu arcanu.

Lacrime n'aghju pientu da empie una funtana,
Ùn so mancu sicura d'essene sempre umana,
È tutte isse parolle parenu scritte in vanu.

In vanu ©11-09

I Pienti d'Una Mamma

2009-11-15T13:20:00.004+01:00

Sì partutu suldatu, fieru è curagiosu.
Sì ghjuntu in una cascia ch'elli avianu chjosu,
Cuperta di a bandera di la cara nazione
Ch'è tù ai difesu cun fede è passione.

Anu datu à mamma a medaglia d'argentu,
Ultima testimonia di lu to soffiu spentu.
Degna è ferita donna, si perde un figliolu,
È per l'eternità ne purterà lu dolu.

Quantu ci ne serà mamme afflitte in sta terra,
Chì anu vistu parte u so sangue à la guerra ?
Quantu lacrime amare è suppliche mandate,
A u celu imputente ancu s'ellu cumpate..

In ogni cunflittu chì strappa oghje lu mondu,
A fiancu à ogni omu, cunvintu è furibondu,
Di causa ghjudicata da l'altri, o bè o male,
I pienti d'una mamma sò innu universale.

Ch'importa lu culore di l 'elmu o di la vesta,
Verdi, bianchi o grisgi, o di culore celesta,
U solu, à una mamma, ch'ùn li possi dispiace,
E quellu tralucente di a santissima pace..

I Pienti d'Una Mamma ©11-09

Messaghju

2009-11-15T07:55:00.003+01:00

La notte s'impatrunisce di tuttu ciò chì mi circonda,
Si piglia l'aria, si piglia la terra è si piglia l'onda
Nantu l'onda avia messu un battellucciu di carta,
Hè smaritu u mio vascellu in la zeppa notte sparta.

Nantu, eiu ci avia scrittu cu l'inchjostru di le pene,
Un missaghju chì dicia u mio piu grande secretu,
Parlava di un amore chì corre in le mio vene,
Palisava la ferita d'iss' impussibile affettu.

Forze, s'ellu tene forte senza fà si inabbissà,
U battellu ghjungerà finu à l'alba salvatrice,
Stu fragile messaghjeru tandu puderà cunfessà
A lu ghjornu chì si pesa, isse dulente venice.

Ma, ancu puru à palesu, u dulore ùn pò piantà.
Cum'è un fandoniu fidu à la mio vita s'agguanta.
Ferma in mè notte è ghjornu, seppellitu sottu pella,
È senza avè permissione a mio alma affratella.

Messaghju © 11-09

L'Alma à Sa

2009-11-13T13:58:00.002+01:00

Nanta stu caminu incertu fermanu sperenze in fulena,
Cumpagne pè l eternita d un' alma sola chì prumena,
Un mazzulu in manu manca cumpostu di tantu dulore,
chì certe alme, più serene, anu battizatu "l'amore"...

Più chè ruvida hè la strada, cum' una longa dannazione,
Fusse ella puru tagliata, ma chì pò dà si a permessione ?

L alma à sa, ciò ch elle sò, stè stonde perse à circa sempre
Daretu porte arrughjinite chì nisuna forza ùn sà apre.
Sdraiate in dietru ci dormenu le più belle di le prumesse,
È u spirdu campa sapendu ch elle ùn puderanu mai esse.

Più chè ruvidu hè l amore, cum'una longa dannazione
Fusse ellu puru beatu, ma chì pò dà mi s illusione ?

L'alma à sà © 11-09
un ghjornu d illusione
di novembre 2009

U Musichente

2009-11-11T13:57:00.005+01:00

E so note, negre è bianche, sò stampate in la mio pella,
Ci nasce un' armunia chì mi porta à u celente,
Tandu, quassù, m'arriposu, arrimbata à una stella,
Ziculata da l'accordi d'un abile musichente.

A so musica magia s'ammaestra la mio vita,
È ne diventu la schiava d'una dolce meludia,
À piantà l'ore una stonda, a so ghitarra m'invita,
E so mane, cum'è fate, m'insegnanu la mio via.

Ùn e sentu altri soni chè quelli di lu so cantu,
Tuttu in giru si cunfonde, in un chjaru firmamentu.
U mio caru cuncertistu hà guaritu u mio turmentu.

Ne fermu quì, appaciata, cum'è in un locu santu,
A mo stanza hè cambiata in catedrale d'argentu,
Issa meludia, pura, hà stanciatu lu mio pientu.

U Musichente © 11-09
à tè, à voi, cù amicizia ;)

Berliner Mauer

2009-11-09T12:20:00.005+01:00

Oghje face vint'anni ch'ellu si ne falatu,
Sott'à a mazzola ardita d'una revuluzione.
Ma quantu si sò morti senza avè lu francatu,
U muraglione negru simbulu d'oppressione ?

Mi vogliu ricurdà di la zitella orfagna,
Vitima d'un cunflitu ch'ell'ùn hà mai capitu.
Mi vogliu ricurda d'a donna chì si lagna,
Perchè, di l'astru latu, ferma lu so maritu.

Mi vogliu ricurdà di l'omu curagiosu,
C'hà vulsutu passa pè ritruvà la ziglia.
Mi vogliu ricurdà d'u vechju silenziosu,
Mortu solu, ..à trè passi di la cara famiglia.

Mi vogliu ricurdà di tutte l alme umane,
Ch'anu suffertu un ghjornu d'esse d'una nazione.
Vogliu, eiu, sperà è crede chì dumane,
Mai più ùn crescerà nisunu muraglione.

Berliner Mauer © 11-09

09-11-09

Sognu di Tè

2009-11-07T12:43:00.004+01:00

Ora affaca l alba, bianca è silenziosa...
Aghju fattu un sognu duvè tu c'eri tù..
Mi ferma di lu bughju stà stonda luminosa,
Quandu in li to bracci, aghju persu a virtù.

Hè vivu lu ricordu di lu to soffiu caldu..
Frà sognu è verita cì sera una leia ?
L averaghju suniatu u to sguardu smeraldu,
È la to pella croscia mischjata a la meia ?

Chimerica passione colma di verità,
Ora affaca l alba...mi devu discita,
È scanta, pè un ghjornu, u ricordu di tè.

Quand'ellu vultera u beatu vesperu,
Spergu chì pianterà u meiu l addisperu,
È, chì le nostre mente seranu torna unite.

Sognu di tè © 11-09

Lettera

2009-11-05T12:44:00.007+01:00

Pè parlati di mè, mi basta una stonda.
Ci hè pocu à sapè è nunda à sperà.
Tutti i mio sogni belli correnu nantu à l'onda,
È quessa l'onda nera nunda a pianterà.

Stu fiuminale mossu, si porta le mio ore..
Perse pè l'oramai nant'à stu fogliu biancu,
Duvè, senza luttà, a mio musa si more,
Arrinata à le sponde di lu mio esse stancu.

À chì ghjova di scrive s'ell' ùn si pò stancià,
Iss'affannu ch'aghju in mè è chì mi ferma fidu
Tandu mi lasciu parte è devu rinuncià
È ormai pè sempre, facciu tace stu stridu

Pè parlà ti di mè, mi bastava una stonda
U curagiu mi manca da palisà ti tuttu
Ma sì la to lettura si pò fà vagabonda
Frà mezu à li filari, poi coglie lu fruttu

Tutti i mio sogni belli correnu nantu à l'onda,
È quessa l'onda nera nunda a pianterà
Pè parlà ti di mè, mi bastava una stonda.
A stonda hè passata .. è mai vulterà

Lettera.. © 11-09

*
05/11/09

Dì mi

2009-11-03T05:48:00.006+01:00

Eiu i trovu amari è tristi li to mondi,
Duve tù ti ne vai u to esse à distrughje.
U capu versu a terra, pienghi è ùn rispondi.
Cu stu velenu in tè cosa cerchi di fughje ?

Voli fughje lu sole, l'aria pura è l'amore ?
Dì mi sè tù a pensi chì di campà ùn vale..
Voli fughje l'amichi a dulceza d'un fiore ?
Dì mi perchè a vita ti face cusì male..

Duve tù ti ne vai, più nimu ùn hè vultatu,
Ùn ti possu lascià francà l ultimu passu.
Dì mi chì possu fà pè dà ti torna fiatu,
Ùn ti possu lascià more à capu bassu.

Se t'ùn poi parla, basta chè tù mi guardi,
Tandu possu capì ancu ciò chè tù taci.
Dì mi chè tù a sai ch'ellu ùn hè troppu tardi,
E chì poi piantà stu scempiu chè tù faci.

Eiu è tù adduniti, cun forza di fà fronte
À stu velenu biancu chì corre in le to vene
Adduniti inseme da custruì stu ponte
Chè tù devi francà, core tesu à l'avvene

Dì mi © 11-09

Angélique Bazziconi / Michel Solinas

Aldilà

2009-11-01T19:21:00.003+01:00

Aldilà di questu mondu,
Duvè ùn c'hè piu cuscenze,
Un spiritu vagabondu,
Po piglia cent' apparenze,
S'universu immateriale,
Cì pò fà esse plurale.

Si po esse capitani,
D una nave cunsenziosa
Aisà, a duie mani,
Una mossa virtuosa,
E fà luce un fanale,
Da fà cresce un ideale.

Si pò esse ancu pirati,
Senza ne pieta ne fede,
Daretu i screni, pietati,
A verita.. ùn si vede.
Diventa superficiale,
Di sintimu artificiale.

Ma, pudemu firma quessi,
Chè no simu in vérita,
Differenti ma listessi,
Ricchi di diversità,
Fin' a truva lu nurmale,
Issu mondu virtuale...

L' Esiliatu

2009-10-28T10:27:00.002+01:00

Sò un omu discretu à passu misuratu,
U sguardu viotu è tristu, in brama d'un surrisu.
S'è di carne è di sangue sò anch'eiu impastatu,
Portu a mio differenza annanta lu mio visu.

Sò eiu, u migrante, mi chjamate " fresteru ",
Quellu à u quale nimu ùn porghje la so manu,
Eiu ch'aghju cridutu chì forse à lu stangeru,
Truverebbe l'agrottu di un calore umanu.

Vulia solu vive fughjendu a puvertà,
Aghju trovu u disprezzu, a vituperazione.
Svaniti sò i sogni di la mio libertà,
E a mio sorte stessa mi face cumpassione.

Fermu cusì luntanu, di capu è di core,
U pagu più chè caru u m'esiliu infecondu,
Ma, fà casu, ch'un ghjornu, s'ellu ti tocca à corre :
Hè l'altrò di un altru ogni locu in lu mondu...

L'Esiliatu © 11-09
Ottobre 2009

Ti tengu caru Pueta

2009-10-22T20:52:00.013+02:00

À tè, chì sai fà cresce
Fiori in lu mio disertu.
À tè, chì poi lascià mesce
U sangue, à core apertu.

Metti e to ferite à palesu,
E meie diventanu toie
U mo soffiu à lu toiu appesu,
E facciu meie le to gioie.

Incù le to rime fatate,
Incù l'oru di lu to versu,
E to duie parolle date
Ponu fà scambià l'universu.

À tè chì mi porti la pace
Quandu mi ferisce la vita,
Quandu u silenziu si face,
U to cantu, ellu, mi seguita.

À ciò chì si simpliciamente
Offrendu la to alma schietta,
So ricca di le to sumente,
È ti tengu caru pueta...

Ti tengu caru Pueta © 11-09
Ottobre 2009

Banditu

2009-10-13T11:55:00.003+02:00

So Rè di l aspra muntagna,
Suvranu di fiuminali,
Monarcu di li teppali,
Ma nisunu ùn m accumpagna.
In stu più chè stranu regnu,
L assenza hè la me patrona,
E la meia la curona,
Ùn hè d'oru ma di legnu.
In le notte triste, stanche,
Nant'un pagliacciu grisgionu,
Vene in mente un solu sognu :
...Letu di lenzole bianche.
A sulitutine, ormai,
Assurtisce le mio ore,
Banditu so, pè l onore,
Eri, oghje ma giammai.

Banditu © 11-09
Ottobre 2009

S'ella Mi Dà

2009-10-05T20:27:00.004+02:00

Hè vita chì ci porta à filu di destinu.
Ùn vale nè putere, nè orgogliu mischinu,
Chì tantu, à la fine, simu tutti fulena...
Ùn ne face spartera... quella chì ci prumena

Ma sì ella mi dà furtuna di campà
Core tesu à l'avvene eiu mi vogliu lampà,
Mi vogliu imbriacà di tutte le bellezze
Tene à mente lu dolce, sminticà l'amarezze.

Vogliu apprufittà di e cose e più chjuche,
Ritene à lu mio latu ciò chì cerca di fughje
Ancù sì la mio musa ùn trova rima ghjusta
Scrive à più pudè... U silenziu mi frusta !

Quandu seraghju vechja, cù lu visu aggrinzatu
Colma di ciò chì l'altri averanu scantatu
Mi n'anderaghju à dorme in un pratu di fiori,
Duve riposa l'alma di i più belli amori ...

S'ella mi dà © 10-09

More pianu pianu

2009-10-01T08:56:00.004+02:00

Si nè more pianu pianu

Quellu ch'ùn sà andà luntanu,

Quellu ch'ùn sà un libru abbraccicà,

Quellu chì ferma sordu à a musica.

Quellu ch'ùn sà nunda truvà,

Nunda osservà.

Si nè more pianu pianu,

Quellu ch'ùn hà più dignità,

È ch'ùn si lascia aiutà.

Si nè more pianu pianu,

U schiavu di li so ghjorni.

Fendu i stessi passi, senza mai cuntorni.

Sempre versu un nunda assuntu,

Ùn risicheghja mai à scambià d'un puntu !

Hè sempre u listessu u culore di li so panni.

A ellu, u novu li porta l affani.

Si nè more pianu pianu,

Quellu chì scanta a passione,

A timpesta di l'emuzione,

Di quelle chì vi rimettenu arriti,

Chì riparanu i cori feriti.

Si nè more pianu pianu,

Quellu chì ùn scambia di via,

Quand'ellu hè a l agunia

Ind'u travagliu o in amore.

Quellu ch'ùn scambia u so dulore.

Quellu chì di i sogni ùn face verita !

Quellu chì mai una volta in la so vita

Ùn hè fughitu, di petu a cunsigli fundati !

Vivi avà e dà ti !

Oghje fà ci fronte !

More pianu pianu ùn la devi accettà !

Ùn ti priva micca di felicita !

otobre 2009 Libera adattazione di l'opera di Pablo Neruda Muere Lentamente

Ottobre

2009-09-25T20:28:00.009+02:00

Sò figliola d' ottobre, nata dopu à l'estate,
Quandu l'aria infiarata, gira in stonde cutrate,
Chì tuttu pare appesu à ciò ch' ora ùn ci hè più,
Aspettendu in silenziu un novu principiu.

Aghju un vestitu longu, fattu di nebbia bianca
Chì u vaghjime m'offre, senza mai stancà
Aghju un cappellu d'oru, fattu di foglie morte,
Sott' un vechju castagnu l'auturnu e m'hà colte.

Sò figliola d'ottobre, sò nata cù lu ventu,
E cù le prime acquate, linde cum'è lu pientu,
Chì danu à la terra quest'unicu prufume :
Iss'odore d'amarezza mischjata di dulciume.

Musica Micheli Solinas

27-09-09

Piazza Santu Niculà

2009-09-15T14:54:00.001+02:00

Sei ore di matina, piazza Santu Niculà,
Un omu, à l'ochju scuru, d'issi paesi culà,
Aspetta una vitura pè andà à travaglia.
Ogni ghjornu u stentapane hè una battaglia...

Ott'ore di matina, piazza Santu Niculà,
A so spazzula in manu ellu a sà azziculà,
Studià in cuntinente ùn ci hè vulsutu andà.
Ma u so ciucciu, di sicuru, l'hà da mandà.

Pusati, nant'un bancu, à l'acqua è a lu ventu,
Dui vechji soli guardanu passà u tempu.
A figliola ? travaglià ! Ùn hà tempu à dà li capu,
E a dumenicata à d'altri sciappacapu.

Tuttu u dopumeziornu, piazza Santu Niculà,
I culombi, spenserati, cercanu à spitticulà,
Un brisgiulu di pane o un fruttu immerzitu.
L'omu chì posa in terra ùn la pò fà è ferma zittu.

A sera casca avà... a piazza hè bughjosa,
A zitella, in mancanza, cerca una dosa.
Di sicuru a truverà, ch'importa a manera,
Ancu sì, sputtanà si, ùn era a so preghera.

Passa cusì, a vita, piazza di l'indifferenza.
Ma, guarda à l'ingiru è senterai a viulenza
Chì runzeca lu mondu di l'ognunu per sè...
Pietà è cumpassione ? Nant' a Piazza si sò perse !

A Ringrazià Ti

2009-09-02T10:30:00.005+02:00

Di u tempu beatu duv'avia vint'anni,
Ùn mi ne ferma più chè ricordi luntani.
Eppo mi fermi tù, più presente chè mai.
Babbu, amicu è fratellu chì veghja li mio guai.

Si tù ch'aghju chjamatu in ogni stonda amara.
Fendu di la mio notte un'alba linda è chjara,
Ai sempre rispostu cum'un fidu suldatu.
Sempre, senza cuntà, sì statu à lu mio latu.

Sì solu tù chì a sai chì spessu sò cascata.
Eranu toie e manu chì m'anu addirizzata,
Nantu a strada di a vita chì ferisce i cori,
Appacendu u mio esse di tutti issi dulori.

Pè e parole zitte è quelle palisate,
E ferite, e vittorie, i pienti è le risate.
Pè u tempu beatu di li nostri vint'anni
E nostre vite d'eri, l'oghje, i lindumani....

Dinù...

2009-08-31T16:49:00.007+02:00

Mi pesa più chè più di fà fronte à i ghjorni duve ùn cì si più,
E le notte bianche, duve tù sì presente, pesanu ancu di più.
Rimore è silenziu mi parlanu di tè senza mai piantà.
Volt' è gira la storia, ùn esiste manera pè fà ridiventà,
Dinù...

Vogliu, di le mio mane, custruì i dumani felici è leggeri,
In un giardinu piattu, d'amore suminatu, chì s'assumiglia à eri.
E guardà ti ballà, in una valsa scema d'un pudè la piantà,
Volte è gira la valsa, d'una vita nuvella chì ti vogliu inventà,
Dinù...

Dinù à lu to latu, è sente lu to fiatu, a to risa, u t' amore.
Mette focu à i ghjorni chì fermanu cutrati, pinghje li di calore.
Ammaestrà lu tempu da pudè ne fà firmà i so minuti,
Parlà pianu pianu, palisà i secreti, i sintimi taciuti,
Dinù...

Ghjè "dinù" a prechera ch'o mandu,
Solu "dinù".
Eiu ùn dumandu
Nunda di più !

Settembre 2009

Inseme

2009-08-21T11:13:00.003+02:00

Pè u peghju e per u megliore, sin'à a morte.
Pè una vita sana, un attimu, una stonda...
Ùn la po sapè nimu chì ne fera la sorte ;
Quale hè chì firmera solu annantu a sponda ?

Una manu, aggrinzata, accarezza un ritrattu...
A patena in carta d'un amore prumessu.
A fiura hè ingiallita è un cantu hé piegatu,
Ma i sposi allegri surridenu listessu !

In fondu di lu scagnu di legnu tignulatu :
Una cullana rotta, un spechju, una spiglia,
Una petretta bianca è un fiore siccatu,
E altrettantu tesori di pacuttiglia...

E perule infilate di lu so Paternostru,
Parenu sintinelli, vighjandu nant' u mondu.
Un quaternu strappatu, taccatu di l'inchjostru
Ch'hà scrittu a so vita, à l'usu vagabondu.

Ind'é a grande stanza, bagnata di luori,
A manu tremulendu richjode quellu scagnu.
Ma u fiore siccatu, ancu senza culori,
Cappia sempre un prufume dillicatu è magnu.

Si sente in ogni cosa una dolce presenza,
Hè fattu di ramentu ogni pichju di core,
Sò ligati inseme in un'eterna allienza.
Un cusì grand'amore ùn si pò mai more.

Inseme © 11-09
23.08.09

Tempu

2009-08-17T15:25:00.002+02:00

Un passu, eppo un'altru, sopr'u violu di terra,
Trafurca la mio mente frà àndatu è presente.
Mi ne ritornu in casa, aghju persu a guerra :
Suldatu di lu tempu à u sognu cadente !

Collu scala di legnu, l'aria hè silenziosa,
Assaltata da ciò chì rimane sparitu.
Ma, in pedi, resistu, eppuru suspirosa
Facciu fronte à té, benchì u core afflittu.

Tempu, m'ai datu, ma m'ai ancu arrubatu
S'ore vissute quì chì mi pichjanu in core.
In stu locu casanu, u mo spirdu esiliatu,
S'appende à lu to collu pè piantà le to ore.

Trà mezzu à le mane chì unite t'imploranu,
Si ne scappa a fulena di la mio ghjuventù,
Ma a to corsa scema scunnosce u mio affannu,
A mio supplica vana vola à lu to ventu.

Tempu © 11-09
agostu 2009

À Mamma

2009-08-07T11:54:00.006+02:00

T' aghju messu fiori bianchi
Induve tù stai.
Ti vulia dì chi manchi...
Ma quessa à sai
Chì ti vulerebbe à fiancu
Ora più chè mai.

U t'amore tale è quale
Giammai si tacce
Cum' un'aura immurtale,
Chì nund'ùn disface.
Sott'u celu di Rapale
Arriposa in pace.

In paradisu, ormai,
T' accoglie u Signore.
Tù l'ai pregatu assai
Cù tantu fervore...
À fiancu soiu, tù ai,
A piazza d'onore.

Un ghjornu ci truveremu
Induve tù stai.
Tutti inseme camperemu,
Ma quessa à sai.
Eiu à sò, cì teneremu,
Tandu più chè mai.

Angélique

L' Orizonte

2009-07-29T21:37:00.006+02:00

Vulia scrive trè filari
Cu l' inchiostru di la mio pena.
Cuntatti li ghjorni amari,
I mille passi annant'à a rena,
Ad aspettà, u pichju in fronte,
Un batellu à l orizonte.
Ma in la mio isula sola,
Di tutti fermu abbandunata.
E u mio sognu si ne vola
Cù a sperenza alluntanata.
Ferma u dulore d'un pichju in fronte
Ùn ci hè batellu à l'orizonte.
Ancù u m'inchiostru hè siccatu
E i filari ùn anu sensu.
U mo scrittu hè un piratu
Chì palesa ciò ch'eiu pensu.
Senza guarì u pichju in fronte,
Senza battellu à l'orizonte.
E pichjà in fronte à più pudè
L' amarezza di quelli ghjorni,
Lascià e parole zitte è mute
E i passi senza ritorni.
E mi scimisce u pichju in fronte
E s'annigrisce l'orizonte...

....Hà pigliatu fondu u battellu

L' Orizonte © 01-10

Musica Antone Marielli

27-11-08

Aghju

2008-12-05T18:17:00.010+01:00

Aghju in mè una timpesta calata,
L'amarezza ora si n'hè andata.
Aghju una strada aperta, è ancu di più
Aghju in mè una nova ghjuventu !

Aghju in core un surisu, una manu tesa,
Un pardonu, pè scurdà mi di l offesa.
Aghju una ferita chiosa, è ancu di più...
Aghju in core cum'un altra ghjuventu !

Aghju in capu un' arietta chì canta,
E a voglia di sperte la hè tamanta.
Aghju un' allegria a dà, è ancu di più,
Aghju in capu un eterna ghjuventu !

Aghju © 01-10

Angélique Bazziconi/ Michel Solinas/ Arnaud Giaccomoni
novembre 2008

O Caru

2008-10-13T09:15:00.008+02:00

So elli chì ci portanu, i so sguardi, i so surisi, guariscenu tutte le pene.....
U to sguardu di zitellu
Schjarisce la mio sorte
Unicu è preziosu giuvellu
Mi rendi soda è forte

Un tempu hè filatu
Un altru hè per nasce
In lu chjosu tralasciatu
hè a vita chì pasce

U to surisu o caru
Muntagna di purezza
Sguassa tuttu l'amaru
È vince a tristezza

U tempu oramai risanatù
Si mette torna à fiurisce
O caru fiore dilicatu
U to amore mi nutrisce

Suvranu di la mio vita
Piu chè Principe o Rè
U mo amore à l'infinita
Si piu chè piu, si piu chè mè.

Puntellu di la mio vita
Dai un sensu à le mio ore
U mo soffiu à l'infinita
Porti a mo notte à l'albore...

O Caru © 01-10

Musica Micheli Solinas

ottobre 2008

Divorziu

2008-10-09T19:51:00.003+02:00

Femu u bilanciu d'un passatu
Di gioie è di pene cumpostu
Ci simu tantu tanti amati
Avà quantu tempu a guarì ?
Fermemu soli, core feritu,
D'un amore oghje svanitu.

Rinuncià, éccu ciò chì ferma.
Rinnegà, ùn ne vale a pena.
Abbasterebbe una sperenza
Da rimpiazzà tamenta assenza,
Brama di sguassà u passatu
D' un muvimentu dilicatu.

Ma a s'ora ùn fermà più nunda,
Ne brama, ne sperenza alcuna.
D'un amore mandatu in fume,
Ùn sopravive nisunu lume.
Di ciò chì fù, di eiu è tù,
Ùn ci ne ricurdemu più.

Femu la finita 'ssa guerra,
Chì 'ssu ghjocu di la miseria,
Ci porta à l'abbuminazione,
D'un odiu senza cumpassione.
Piantemu lu quì u cunflittu,
Ne tù, ne eiu, avvemu vintu.

Divorziu ~~ 09-08
settembre 2008